IL MIO PROGRAMMA

Zena bella!

Proposta-1-Arcangelo-Merella-Sindaco-Genova

1. Unna vixon strategica pe-o futuo da çittæ

Çinque anni o l’è un orizzonte de tempo curto pe cangiâ unna çittæ in mainea conscistente; ma ghe n’è à basta pe capî donde se veu anâ e cöse beseugna fâ pe razzonze l’obiettivo.

Pe fâlo, però, ghe veu unn’idea ciæa da çittæ che voemmo: quæ profî industriale, econòmico, sociale e colturale, quæ prioritæ e quæ instrumenti deuviâ; sto chì veu dî dâghe à Zena un grande cian strategico ch’o definisce quello ch’a veu ëse e a saià do 2030; un progetto ch’o va inandiou con l’arrembo de di esperti avvoxæ de livello internaçionale, perché Zena a l’à unna grande stöia a s’ô merita; un progetto ch’o no peu ëse de unna parte sola perché o l’è da çittæ areo.

Conscidero primmäio inandiâ sto percorso insemme, perché o futuo o l’è de tutti.

Pe fâlo gh’ò l’intençion de organizzâ unna conferensa strategica avanti da fin do 2017.

2. O decöo a-o centro de l’attivitæ de l’amministraçion

A qualitæ da vitta a se mesua inta nettixe de stradde, di giardin, de facciate e de aree pubriche in areo.

L’abbandon o crea o degrado, o fâ cresce o senso de inseguessa, o genera desaxo diffuso.

Pe questo un di obiettivi primmäi do mæ mandato o l’è quello de portâ torna o decöo a-o centro de l’attivitæ amministrativa pe unna çittæ bella, primma de tutto.

Veuggio progettâ unna çittæ à mesua de figgeu e ançien: se va ben à liatri a l’anià ben à tutti.

Gh’ò in cheu un grande cian de manutençioin ch’o parte da-e reorganizzaçion di compiti de Amiu e Aster.

Un cian ch’o prevedde a sostituçion di cartelli straddali e de ræ elettriche vege co’unna segnaletica “mini” ma ciù de boña reisa e meno invaxiva, e unna campagna dua e inscistente contra l’imbrattamento de facciate, co-a parteçipaçion attiva di çittadin e poxiçionamento de de telecamie in scî casamenti pubrichi.

Proposta-2-Arcangelo-Merella-Sindaco-Genova
Proposta-3-Arcangelo-Merella-Sindaco-Genova

3. A çittæ antiga ch’a genera resorse

I caroggi en o cheu da çittæ e a-o mæximo tempo l’imagine ciæa de tutte e seu contraddiçioin: turismo, arte e coltua convivan co-o degraddo, l’inlegalitæ e l’abbandon.

Unna scituaçion che emmo da risòlve pe fâ in mòddo che a çittæ antiga a torne à generâ resorse.

In speciâ mòddo intendo pontâ in sce diverse tipologie de intervento, tra e quæ:

  • Un cian straordenäio de interventi – bonifiche e (donde ghe veu) demoliçion limitæ – che interessan a parte di caroggi compreisa tra a Commenda de Pré e San Loenso, tra via Cairoli e Ciassa Carregamento.
  • Un progetto sperimentale de repiggio da zöna do Ghetto fondou in sciâ solidarietæ tra generaçioin, con pixoin agevolæ pe-i studenti che çernan de agiuttâ di ançien che stan da soli, int’un rappòrto de vexinansa attiva.
  • Unna serie de iniçiative dedicæ a-o rinforsamento e à l’imagine di Palaçi di Ròlli, pe fâli diventâ un vertadeo scimbolo da çittæ, ch’o se pòsse esportâ inte tutto o mondo.
  • Un agiutto concreto a-e attivitæ commeciali tradiçionali e a-e butteghe stòriche.

Zena ch’a fonçioña, segua, vivibile!

Proposta-4-Arcangelo-Merella-Sindaco-Genova

4. Çittadinansa attiva e volontariato pe unna çittæ ciù giusta e solidale

Chi o vive a çittæ e i quartê o l’è o nòstro megio alleou inta soluçion di problemi, grendi ò piccin che seggian.

Veuggio portâ torna l’açion de l’amministraçion communale vexin a-i çittadin, con promeuve de iniçiative de parteçipaçion attiva e de volontariato ch’aggian à vedde pe primma cösa co-a lòtta a-a povertæ e à l’emarginaçion; un scistema de welfare diffuso, ch’o sacce “piccâ a-a pòrte de chi o l’à beseugno”.

Dexideo pontâ in sce l’alleansa tra rexidenti e operatoî econòmichi à livello de quartê pe di progetti de riqualificaçion urbaña e de repiggio do valô di spaçi e di sciti, in sciâ base de megio pratiche za inandiæ inte ben ben de çittæ do mondo.

O mæ programma o prevedde ascì o progetto de coinvòlze migranti e rifugiæ inte de attivitæ de manutençion diffusa: che òffran in cangio de l’ospitalitæ garantia da-o Stato, sensa òneri pe-o Commun, o seu suppòrto pe di travaggi de pubrica utilitæ.

5. Ciù poei a-i Muniçipi pe unna çittæ ch’a fonçioña

O Muniçipio o l’è a parte de l’amministraçion communale a ciù vexiña a-i beseugni di çittadin.

I prescidenti e i conseggê di Muniçipi conoscian e vivan tutti i giorni e scituaçioin de difficortæ inti quartê e, de spesso, an e idee giuste pe affrontâle.

Pe questo beseugna dâghe a-i Muniçipi di poei segui e de resorse adattæ, à traverso unna bella revixon de fonçioin e di bilançi, riportando a-o mæximo tempo i Muniçipi à aveighe e competense e i mezzi pe occupâse da manutençion di marciapê, di partær e do verde pubrico, e do repiggio colturale di scingoli quartê da çittæ.

Proposta-5-Arcangelo-Merella-Sindaco-Genova
Proposta-6-Arcangelo-Merella-Sindaco-Genova

6. Seguessa e vivibilitæ pe tutti i çittadin

O tema da seguessa o l’è ancheu tra i ciù sentii da-i çittadin zeneixi.

Inte çerti quartê – San Pê d’Æña, Caroggi, Val Ponçeivia – o l’è ancheu unna prioritæ.

Vive seren e sentîse protezzui o l’è un drito de tutti. Pe questo gh’ò l’intençion de promeuve di progetti dedicæ à st’instansa che con partî da-e zöne e ciù compromisse coinvòlzan a çittæ intrega.

L’introduçion do cantonê de quartê a constituisce un impegno da portâ avanti, con dâghe un ròllo neuvo e ciù degno a-a Poliçia Muniçipale.

Creddo ascì che l’abbandon e o degraddo rinfòrsan a perçeçion de inseguessa e impediscian a-e persoñe e ciù deboli de gödî de opportunitæ do seu quartê. Pe questo me impegno à garantî inte tutti i quartê un parco netto e de bon accesso, di percorsci de salute adattæ à tutte e exigense e, in areo, unna manutençion efficente de aree pubriche.

O mæ impegno o l’è anche quello de portâ avanti i progetti pe-a missa in seguessa do territöio, espòsto à frañe e alluvioin, e pe defende o seu da neuve aggrescioin.

Zena ch’a l’ammia a-o futuo!

Proposta-7-Arcangelo-Merella-Sindaco-Genova

7. Economia do mâ, hi-tech e turismo pe sciortî da-a crixi

Zena a l’è unna çittæ da-e grendi potençialitæ.

L’economia do mâ, l’hi-tech e o turismo peuan rappresentâ un volan bon à portâ a çittæ feua da-a crixi e offrî un futuo a-i zoeni, che ancheu son in çerca de un lou. Son i elementi in scî quæ pontâ pe fâ de Zena unna çittæ ch’a travaggia, a fa da reçerca, a produxe e a compete co-e atre grende çittæ d’Euròpa.

Pe razzonze st’obiettivo chì beseugna avanti de tutto completâ tutte e òpere za inandiæ e rompî l’isoamento da çittæ.

Ätretanto indispensabile o l’è o neuvo assetto ferroviäio à Ponente co-a connescion diretta à l’ariopòrto – ch’o deve diventâ un pòlo low-cost pe Spagna, Africa, Est Euròpa e pe-e croxee – e a-o pòlo tecnològico di Erzelli. E pöi beseugna dâghe un cianto lì co-i retardi e e promisse pe l’ampliamento da banda larga e do wi-fi inte tutta a çittæ.

8. O privilegio do paisaggio e a mobilitæ sostegnibile pe fâ de Zena unna çittæ à emiscioin zero

O privilegio do paisaggio o l’è un benefiçio ch’o va asseguou à tutti. O passa da-a defeisa do territöio e da l’implementaçion do verde. Dovemmo aveighe l’ardî de pensâ torna a-i nòstri erboi, çerne quelli che vëgnan ciù à taggio pe-o nòstro climma e pe-e nòstre stradde, ciantâ di erboi donde o l’è poscibile.

O modello de mobilitæ, pubrica e privâ, o va drasticamente ripensou: o l’è ancon inefficente, inquinante e costoso. Voemmo investî in sce un cian pe-a mobilitæ sotegnibile pe cangiâ Zena int’unna çittæ green. Con partî da-a sostituçion di vegi celeri con di mezzi ciù netti e efficenti; in speciâ mòddo, o tram, ch’o rappresenta pe-a Val Besagno e pe-a çittæ areo a soluçion a ciù efficiente da-o ponto de vista do transpòrto e a ciù efficace pe-o repiggio urbanistico do territöio. O gio verde o deve coinvòlze o transpòrto privou ascì; pe questo gh’ò l’intençion de inandiâ di cien de inçentivo a-a mobilitæ elettrica e unna ræ diffusa di ponti de recarrega.

O tema da sostegnibilitæ o creuve pöi ben ben de comportamenti: a corretta racuggeita differençiâ da rumenta, a preferensa verso o transpòrto pubrico, ecc.; serviçi a-i quæ se porrià accede à traverso de unna carta elettrònica de sostegnibilitæ ambientale. Pe sponciâ sti comportamenti penso à l’introduçion de unna “Carbon Card” à ponti ch’a pevedde di sconti à mesua da sostegnibilitæ razzonta.

Proposta-8-Arcangelo-Merella-Sindaco-Genova
Proposta-9-Arcangelo-Merella-Sindaco-Genova

9. Iniçiative speciali pe unna çittæ colta ch’a compete e a l’attrâ

Zena a l’è piña de eccellense into campo econòmico, da reçerca, da coltua, do paisaggio. Penso à l’Instituo Italian de Tecnologia, à l’Uspiâ Gaslin, à l’Acquäio de Zena, a-o scistema di Fòrti, a-i Palaçi di Ròlli, a-a Çittæ di Figgeu e di foenti, a-o Museo de Arte Orientale Doardo Ciosson, ecc.

Ma ascì a-i tanti studdi de progettaçion e de consulensa inte l’ambito portuale, legale e fiscale.

Tutte ste realtæ van sostegnue e valorizzæ pe offrî torna l’imagine de unna çittæ colta, ch’a compete e a l’attrâ. Pe questo propoño unna serie de eventi boin à repiggiâ e amplificâ st’imagine da çittæ.

Tra sti chì, o deuvio da Sorvielevâ comme grande parco liniâ urban apreuvo a-a construçion do tunnel sub-portuale, un Festival permanente de l’Economia do Mâ, un Gran Premmio de Fòrmola E (a Fòrmola 1 de macchine elettriche), un Festival annuale di cantautoî co-a creaçion de di bistrot muxicali inte vege zöne portuali.